بسم الله الرحمن الرحيم
فجأه وردني تالي الليل جوال
وأنا على شاهي وبسكوت ديمه
الرقم بايخ لكن الصوت قتال
كنه مثل صوت المذيعه حليمه
قالت مساء الخير يا طيب الفال
قلت أرحبي ترحيبة مستديمه
بالعود والصفري ودله وفنجال
واجبك يا بنت الأصول الكريمه
وردت بضحكه ثم قالت وش الحال؟
قلت أشهد أن الحال بعدك سقيمه
قالت وهي تضحك بعد مثل الأطفال
وأنا بعد كني بدونك يتيمه
من يوم قالتها تزلزلت زلزال
من فجعتي كني مسوي جريمه
قلت أرفعي صوتك تري مابه إرسال
كذاب لكن المصيبه عظيمه
قالت أقول أسمع ترى هرجنا طال
ممكن تصاحبني تراني وسيمه
وأسمي الحقيقي أول حروفه الدال
لكن يسموني البنات الزعيمه
صحيح أحب الفخفخه وأعشق المال
لكن تراني طاهره مستقيمه
ما عندي مغازل ولا لعب جهال
ما عندي إلا الشرف والحشيمه
بس الصراحه قلبي لشوفتك مال
وأصبحت وحدك جالس في صميمه
فكر بعقلك وأترك القيل والقال
وأحذر تطيع أهل العقول العقيمه
وأرسل علي ألحين خمسمية ريال
أشحن بها جوال أختي غنيمه
أو طقم غالي فيه خاتم وسلسال
أروح به في عرس وإلا عزيمه
قلت الحقيقه مانيب رجل أعمال
ولا ني بتاجر والموارد عديمه
أنا الصراحه شبه عطال بطال
وعلاقتي بالفقر جداً حميمه
والراتب الله يرحم الحال ما زال
محدود والمصروف ربي عليمه
والدين بالآلاف والبنك شغال
يأكل فلوسي بالربا والضليمه
والسوق طايح والغلا ضيق البال
والموت والله صاير أكبر غنيمه
قالت تحمل بس والحمل ينشال
خلك شديد البأس صلب العزيمه
ياأخي تصرف جعلك تصير نشال
أهم شئ أن النوايا سليمه
لابد تفهمني على كل الأحوال
مادمت من أهل العقول الفهيمه
قلت أيه والله فاهم اللي على البال
لكن ترى هذي علينا قديمه
يا بنت هذا صاير اليوم موال
للي تبي تلعب على ابن اللئيمه
يا بنت ماتدرين كم فيه محتال
يلعب على الحبلين وأنتي غشيمه
يا بنت كم من جاهله دمعها سال
من عقب ما جات العواقب وخيمه
والبنت لا أقتفى عرضها بين الأنذال
والله ما يبقى لها أي قيمه
قالت تبي وإلا فخلك على جال
ماهوب ناقصني نصايح حكيمه
عز الله إنك للأسف منت رجال
وإنك قليل الذوق ما فيك شيمه
يا لعنبو أللي ما يسطرك بنعال
حتى يعلمك الغزل يا بهيمه
(تفو) عليك وصكت الخط بالحال
مدري (تفو) هي مدح وإلا شتيمه
